TEKNOLOGIA BERRIAK: 2016

Txikitatik izan nuen buruan irakasle izateko ideia, izan ere, familian gehienak hezkuntzaren arloan sartuak daude eta azkenean, etxean ikusten duzunaz ikasten dugu gehienbat. Beraz, bigarren hezkuntza hasi bezain laster nire ibilbidea irakasle izateko prestatu nuen, hau da, letretako adarra hartu nuen.

Hala ere, unibertsitateko bigarren mailan nago jada eta ez dut nik nahi nuen ezer ikasi. Eta badirudi, dakidan gehiena eskolaz at ikasi dudala. Hori, hain zuzen ere, zen kartografia honen muina: ikustea eta hausnartzea nondik ikasi dudan irakasle izateko.

Hausnartzen hasi nintzen eta etorri zitzaidan lehenengo irudia nire gurasoena izan zen, haiek izan baitira txikitatik nire ondoan egon direnak eta haiei esker naiz orain naizena. Balio gehienak bertan ikasten dira, familian, alegia.

Ondoren, lagunez oroitu nintzen eta pixkanaka nire haurtzaro guztiaz: kirolaz, musikaz, marrazketaz, bidaiez Beraz, aipaturiko gaiez argazkiak, txanponak, kantak eta treneko tiketak azaltzen dira nire kartografian.

Hauek guztiak kartulina txikiz egindako album batean sartu ditut. Album batean dena batzea ideia ona iruditu zitzaidan, txikitatik gaur egun arte argazkiak albumetan sartuta baititut, bai album fisikoetan, baita interneteko karpetatan. Sentimenduz josirik daude niretzat eta oso adierazgarriak dira gure familian.

Albumaren barruan jorratu ditudan gaiak kuantitatiboki sailkatu ditut, hau da, niretzat garrantzitsuak diren arloak eta balio gehien ikasi ditudanetan hasierako orrietan ipini ditut, eta balio gutxien ikasi ditudanekin azken orrietan. Kartulinen koloreekin ere pixkat jolastu ditu, izan ere, kolore biziagoa zutenak aurrean jarri ditut eta pixkanaka leuntzen joaten dira garrantzia gutxiago emanez bezala. Portada, aldiz, kolore argi batean dago hasiera delako, eta hasieretan dena hutsik egon ohi da, dena zuri.

Lehenengo orrian, kolore gorriz familiaren argazkiak jarri ditut; lehenengo orrialdean gurasoak eta nire anaia, gertuenak direlako ea bigarren orrialdean aitona-amonak, izeba eta lehengusina. Balio asko eta asko ikasi ditut arlo honetan baina esanguratsuenak bakarrik jarri ditut, tokia dela-eta: umiltasuna, errespetua, zuhurtasuna, obedientzia, erantzukizuna eta iraunkortasuna.

Familia

Bigarren orrian, kolore morez lagunak eta Donostia; hirugarren orrialdean lagunak jarri ditut txikitatik ezagutzen ditudalako eta elkar hazi garelako. Haiekin eskuzabaltasuna, tolerantzia eta adiskidetasunaren balioak zer diren ikasi ditut, benetako lagunak laguntzeko daudelako eta askotan gure artean familia txikia osatzen dugulako. Gainera, autokontrolaren balioa ere jarri dut, izan ere, parrandan ateratzen garenean kontrolatu behar gara eta hainbat istorio eta iskanbiletatik laguntzeaz gain, autokontrolatzen ere ikasi dugulako.

Lagunak

Bestalde, beste orrialdean Donostiarena dago. Aurreko urtean unibertsitatean hasi nintzenean lagun batekin hartu nuen pisu bat eta konturatzen gara gurasoak jada ez daudela janaria egiteko, arropa garbitzeko edota mimatzeko. Horrela, autonomia, independentzia, bizikidetza eta askatasuna zer den ikasi dut. Hasieran, zaila egiten da maite duzun guztia alde batera utzi behar delako, zazpi egunetik bostetan, baina heldutasun maila bat hartzeko oso ondo etortzen da.

Donostia

Hirugarren orrian, kolore berde biziaz, kirola eta gaixotasunak ipini ditut. Oso txikitatik hasi nintzen kirola egiten, hasieran, igeriketa, ondoren, atletismoa, eta bukatzeko, saskibaloia. Unibertsitatean hasi nintzenean saskibaloi taldea utzi behar izan nuen eta orain ahal dudanetan igeri egitera joaten naiz. Kirol oso ezberdinak dira, izan ere lehenengo biak indibidualki egiten dira eta bertan, esfortzua ezinbestekoa da, astero entrenatzea eta ikustea hobetzen duzula. Saskibaloia, aldiz, taldekako kirola da eta bertan elkarlana eta besteenganako enpatia izan behar da taldea aurrera joan dezan.

Kirola

Gaixotasunei dagokionez, zoritxarrez, batzuengatik ikastea tokatu zait, bai ebakuntzetatik, baita minbiziengatik ere. Ebakuntzen kasuan pazientzia izaten ikasi dut, izan ere, ez da erraza ospitalean egunak eta egunak igarotzea eta hobe da lasai egotea eta ez urduri. Minbizien kasuan, esperantza izan behar da galtzen azkena eta memento askotan leku guztietatik indarra atera beharra dago.

Gaixotasunak

Laugarren orrian, kolore arrosaz, bidaiak eta mundu artistikoa ipini dut. Bidaiei dagokionez, zorte handia izan dut lurralde ezberdin asko ezagutu ditudalako eta horiekin batera, kultura eta bertako jendearen bizimoduak. Gainera, hizkuntzak ikasteko ez dago modu hoberik bertakoekin hitz egitea baino, eta bakarrik bidaiatzen dugunean heldutasun puntu bat ere lortzen dugu.

Bidaiak

Mundu artistikoari dagokionez, txikitatik marrazketa eta ehoziria egin dut eta gaur egun ere ehoziriak egiten ditut. Horrek guztiak zehaztasuna eta sormena izaten lagundu dit, izan ere, okertuz gero bistan geratzen da eta azkenean, perfekzioa edukitzea ezinbestekoa da marrazkia edota parpailak egiterako orduan.

Mundu artistikoa

Bosgarren orrian, kolore urdin argiz, musika eta komunikabide gaiak jarri ditut. Alde batetik, musikari dagokionez, bederatzi urtetatik pianoa jotzen dut eta askotan, deskonektatzeko modurik eraginkorrena da niretzat. Ez pianoarekin bakarrik, baita abestiak entzuten ere. Gainera, inspiratzeko ondo etortzen da, marrazten den bitartean, adibidez, entzuten duzun musikak eragina baitu. Idatziz, “Human” abestiaren zati bat jarri dut identifikatuta ikusten naizelako letrarekin; azken finean, guztiok gizakiak gara eta perfektuak nahi izan arren, askotan huts egiten dugu eta gure ondoan dagoena garen bezala maite beharko gaitu.

Musika

Komunikabideak geroz eta sartuagoak daude gure eguneroko bizitzetan: telebista, internet, irratia… Horiei esker informazioa “hemen eta orain” izan dezakegu. Gainera, eduki eta jakintza asko horien bidez ikas ditzakegu, bai interesagatik, baita online ikasketengatik ere. Hala ere, denbora pasatzeko eta besteekin komunikatzeko ere balio dute.

Komunikabideak

Azken orrian, seigarrenean, kolore berde argiz eskola eta jendeaurrea jarri dut. Bi gai hauek balio edota jarrera gutxien irakatsi didatenak izan dira. Nahiz eta hiru urtetatik eskolan egon eta 19 urte izanda oraindik bertan jarraitu, formakuntza izan da eman didan gauza bakarra. Curriculumaren bidez edukiak ikasi ditut ondoren horiekin, azterketak gainditzeko. Dena den, irakasle batzuk nire ikaskuntzan zehar erreferentzia bezala izan ditut, haiekin edukiez aparte nigan konfiantza izaten eta nire trebetasunak garatzen lagundu didatelako. Gaur egun, irakasle horiek buruan ditut oraindik eta espero dut etorkizun batean haiek erakutsi didatena nire ikasleei transmititzen jakitea.

Eskola

Bukatzeko, jendaurrean hainbat mementotan egon naiz, antzerkiak egiten, dantza egiten edota hitz egiten. Ni oso pertsona lotsatia naiz eta beraz, asko kostatzen zait jendaurrean edozer egitea eta egin ditudan ekintzak lotsa kentzen lagundu didate.

Jendaurrean

Hau guztia kontuan izanda, esan beharra dago hezkuntza ez arautuan ikasi dudan guztia, hau da, familian, lagunekin, bidaiekin edo kiroletan ikasitako balioak eta jarrerak, hezkuntza arautura pasatzerako orduan eragin handia daukala, baita alderantziz ere. Adibide bat jartzearren, familian ikasitako balio guztiak (errespetua, erantzunkizuna, obedientzia…) gela batean gaudenean balio horiek ez dira zuzenki azalduko, baizik eta zeharka. Hau da, ariketa bat bidaltzen dutenean pertsona horrek hartutako jarreran eragina izango du. Kirolean ikasitako balioak, enpatia eta elkarlana, gelan egiten diren taldekako lanetarako balioko digu, izan ere, beste taldekideak ulertzen eta errespetatzen saiatuko gara.

Bestalde, eskolan ikasitako edukiak eta jakintzak ez dira hainbeste nabarmentzen hezkuntza ez arautura pasatzen ditugunean, edo ez arlo guztietan behintzat. Hezkuntza arautuan ikasitakoa ondo etortzen da bidaiatzeko (historia, adibidez), hizkuntzak ondo erabiltzeko eta kultura orokor bat izateko hainbat gaien inguruan.

Kartografia egiterako orduan hasieran argi neukan eskola ez zela inon agertuko, baina konturatu nintzen bizitza guztia bertan eman dudala eta horren inguruan zerbait aipatu behar nuela, horri esker bainago orain unibertsitatean. Hala ere, hainbat gai egon dira ez ditudanak kartografian sartu: familiaren gaian adibidez, niretzat garrantzitsuenak diren pertsonak jarri ditut soilik, besteekin harreman hain estua ez dudalako eta beraz, ez didatelako besteek transmititu didatena transmititu.

Lagunen arloan, txikitatik ditudan lagunak bakarrik jarri ditut argazkietan, unibertsitatean hainbat lagun izan arren. Unibertsitatean ezagututakoekin ez dut oraindik nire txikitako lagunekin dudan konfiantza bera. Dena den, espero dut etorkizun batean betiko lagunekin dudan adiskidetasuna izatea hauekin ere.

Uste dut hainbeste urte eskolan egonda gehiago ikasi beharko genukeela hortik edo behintzat gure bizitzarako esanguratsuak diren gauzak ikasi, etorkizun baterako balioko dutenak. Hala ere, lan hau egin baino lehen ez nintzen kontziente hainbeste ikasten zenik eskolaz kanpo eta orain konturatu naiz askoz garrantzitsuagoa dela hori eskolan ikasten dena baino. Azkenean, maistra izango naizenean curriculum bat oinarri izanda lan egingo dut, baina saiatuko naiz ez soilik edukiak transmititzen, baizik eta modu afektibo batean edukiak transmititzea eta gainera, haien interesak, jarrerak eta curriculum ezkutua gehiago lantzea.

2016(e)ko urriaren 4(a), asteartea

ETAPA 2: DATUAK ANTOLATU

Hasieran, kartulina bat argazkiz betea egitea otu zitzaidan, baina bueltak ematen eta pentsatzen, konturatu nintzen horrek ez zidala ezer esaten. Argi nuen bideo bat ez nuela egingo txikitan eskuekin lantzen zena gustatzen zitzaidalako eta teknologia oso berandu erabiltzen hasi nintzelako. Egia esan, gaur egun ere, ordenadorean gauzak egiten hasi baino, eskuz egitea nahiago dut.

Azkenean, kartulina txikiz osatutako album bat egitea pentsatu nuen, orri bakoitzean nire bizitzako arlo garrantzitsuenak idatziz eta bakoitzean argazki pare bat edo objektu pertsonalak itsasiz. Halaber, errotulagailuen bidez arlo bakoitzak eman dizkidan balioak idatzi nituen.

Nire albuma nola gelditu den ikusteko, hona hemen argazki batzuk:

Portada

Albuma

ETAPA 1: DATUAK ANALISATU

Aste hauetan zehar gure ikaskuntza prozesuaren inguruan hausnartzeko eta ondoren hori irudikatzeko helburuarekin, zenbait jarduera egin ditugu. Lehenik eta behin, egingo dugun lana aurrera eraman ahal izateko, taldekideak nola komunikatuko garen erabakitzea izan da (facebook, twitter, whatsapp…). Hori berehala erabaki dugu; guztientzat erosoena eta errazena whatsapp talde bat sortzea izan da bertan bakoitzaren lanak, ideiak, zalantzak… partekatzeko. Era berean, “drive” bat ere partekatu dugu irudiak, dokumentuak eta audioak bertan gordetzeko.

Ondoren, proiektuaren inguruan zein erronka, zalantza, helburu… ditugun azaldu behar izan dugu, hain barneratuak ditugun gauzak zein unetan eta nola ikasi edo ikasten ditugun konturatzea ez baita bereziki lan erraza. Lehenengo ideiak ateratzea izan da gehien kostatu zaiguna. Zerbait ikasterakoan kontzienteki (nola ikasten 03 estekatu) jardun arren, urteak pasa ahala inkontzienteki egiten ditugun gauzak bihurtzen baitira, beste batzuk, aldiz, era inkontziente (nola ikasten 03 estekatu) batean ikasten ditugu.

Horretarako, ikasitakoari erreferentzia egiten dion ebidentzia posibleak aipatu ditugu: argazkiak, txanponak, bidai txartelak… eta ondoren hori guztia nola irudika daitekeen eztabaidatu dugu: bideo bidez, album batean…

Proiektua nola burutu oso argi izan gabe ere aurrera jarraitu dugu. Oraingo honetan bakoitzak aproposak iruditu zaizkion ebidentziak (nola ikasten 01 estekatu) astean zehar “drive” bidez partekatzeaz gain, gelara ekarri ditugu bai ebidentzia fisikoak, bai argazkiak. Hau guztiaren bidez gainerako taldekideei azaldu diegu ekarritako ebidentzia bakoitzak zer esan nahi duen guretzako eta zein ikasketa prozesu irudikatzen duen. Batzuek ikasitako edukiei egin diete erreferentzia, beste batzuek aldiz emozioei (nola ikasten 02 estekatu), harremanei, taldean lan egiteari… Honetan ondorio argi bat atera dugu: eskolan hainbeste urte igaro arren, gauza asko eta asko, eskolatik kanpo ikasten ditugula, hala nola, familian, lagunartean, komunikabideetatik eta abar. Honekin ez dugu esan nahi eskolan ikasten ez denik, bertan ematen dugun denbora guztiaren ondoren, emaitzak ez direla izan beharko luketen modukoak baizik (nola ikasten 04 estekatu).

Beraz, proiektu honen bidez konturatu gara askoz ere garrantzitsuagoak direla bakoitzak bere inguruan barneratutako balioak edota besteen anekdotetatik jasotakoa. Izan ere, nahiz eta emozioak ikasteko garaian ezinbestekoak ez izan, asko laguntzen digute enpatizatzeko eta haiekin bat egiteko. Bestalde, eskoletan eduki asko eman arren, gehienetan memorizazio bidez ikasten ditugu eta ez emozio edo istorio errealetatik.

Youtube bideoak:

NOLA IKASTEN 01:

NOLA IKASTEN 02:

NOLA IKASTEN 03:

NOLA IKASTEN 04:

ETAPA 0: DATUAK JASO

Ikerketa honi aurre egiteko lehenik eta behin irakaslearen azalpenetatik abiatu naiz, bera izan baita lan hau nola egin behar dugun azaldu diguna. Kartografia bat egitean datza, hau da, modu bisual batean zerbait erakustea; kasu honetan, irakasle izateko nola ikasi dugun azaltzea. Horretarako, bosteko taldetan bildu gara eta gure ikaskuntzaren inguruko ebidentziak bilatzen hasi gara. Ez da lan erraza izan, izan ere, ikuspegi askori erreparatu behar zaie galdera horri erantzun ahal izateko. Hala ere, taldean egoteak lana erraztu zuen eta guztiok ematen genituen ideiekin aurrera egin genuen.

Bururatu zitzaigun lehenengo ebidentzia argazkiak ateratzea izan zen, azkenean, modurik praktikoena iruditu zitzaigun. Bakoitza den bezala izateko gure ikaskuntzan zehar garrantzitsuak izan diren pertsonak, mementoak, esaldiak eta abar argazkien bidez islatu. Gainera, beste lurraldeetako txanponak, bidai tiketak, txartelak eta abar ere eraman genituen. Adibide bat jartzearren, familia izan zen gehien aipaturiko gaia eta beraz, gurasoen, anaia- arreben eta aitona-amonen argazkiak bildu genituen. Hona hemen beste batzuk:

Irratia

Kartelak

"Amaren eskuak" liburua

Praga

Hasiera batean, irakasleak lana azaldu zigunean zertxobait desmotibatuta hartu nuen; lehenengo eguna zen eta ez nekien nondik hasi, zer pentsatu, zer egin… Erronka bat zen, ez baita erraza hemeretzi urtez bizi dudan ikaskuntza bat, ez soilik eskolan, baizik eta arlo guztietan, kartografia baten bitartez interpretatzea. Ondoren, proposamenak botatzen hasi ginenean, hainbat ideia etorri zitzaizkidan burura eta horrek indarra eman zidan lana gogoz hartzeko eta jarrera positibo eta energiaz beterikoa izateko.

Sarrera honekin bukatzeko, esan beharra daukat ikerketa fase honetan taldekideen laguntza askotan beharrezkoa dela ikasi dut, gehiago pentsatzen dutelako bost burmuin bat baino. Gainera, hasieran lana gogorik gabe hartu nuenez, beste taldekideak izan ziren animatu zidatenak eta ondoren, ni izan nintzen kasu askotan batzuei laguntza eskaini niena. Beraz, elkarrekiko laguntza eta motibazioa ezinbestekoak direla ikasi dut.

NOLA IKASI IRAKASLE IZATEN?

IKT-ko irakasgaiari hasiera emateko “1. Tailerra: Kartografia” deituriko lana abian jarri dugu. Horren abiapuntua irakasleak airera bota digun galdera bat izan da: Nola ikasi irakasle izaten? Lanaren egitekoa galdera horri kartografia baten bidez erantzutea da.

Hasieran, ikerketa hau errespetu puntu bat eman dit baina ikuspegi positibo batekin eramaten dut aurrera. Nahiz eta erraza ez izan eta sormen handia eduki behar dugun, nire burua kapaz ikusten dut lan hau ongi bideratzeko eta ikerketa txukun eta polit bat egiteko.

Hala ere, hainbat galdera etorri zaizkit burura lanarekin hasi behar nintzenean: nola ikasten dut?, Non ikasten dut?, Zertaz/ Nortaz ikasten dut?, Ikasten ditudan gauza guztietatik alde positibo eta negatiboak atera daitezke?, Kontziente naiz ikasten dudan guztiaz?

Eta hori gutxi balitz, erronka asko ikusten ditut lan honetan; nagusiena eta aldi berean zailena ikerketa hau fisikoki irudikatzea da, kartografia baten bidez, edo beste modura esanda, marrazki, argazki, hitz edota objektuen bidez. Gainera, aurreko paragrafoan egiten ditudan galderei (Nola?, Non? Norekin?) erantzun bat bilatzea da nire bigarren erronka. Eta hirugarrena pazientzia ez galtzea eta estresik gabe lan hau aurrera eramatea izango zen.

Bestalde, ikerketa tailerrari esperientzia berriak gehitu diezaioket, baita hausnarketa puntu bat ere.

Azken finean, argiago ikusi nahiko nuke zer da memento, gauza edota pertsona bakoitzetik ikasten dudana irakasle bat izateko. Galdera hori bota baino lehen ez nuen inoiz horretaz hausnartu eta zaila egiten zait erantzutea.

Beraz, lan honetatik prozesu guztian zehar ikasi dudana hitzez transmititzen ikastea gustatuko litzaidake.

AURKEZPENA

2016(e)ko azaroaren 28(a), astelehena

2016(e)ko azaroaren 21(a), astelehena

2016(e)ko urriaren 24(a), astelehena

2016(e)ko urriaren 15(a), larunbata

2016(e)ko urriaren 5(a), asteazkena

2016(e)ko urriaren 4(a), asteartea